ஒரு மாலை நேர விளையாட்டு - பாவண்ணன்

தென்னந்தோப்பு பாதையிலே

சிறுவன் ஒருவன் சென்றானாம்

சிதறிக் கிடந்த குறும்பிகளை

உருட்டித் தள்ளி மகிழ்ந்தானாம்

குட்டை மரத்தின் அருகினிலே

உடைந்த பானையைப் பார்த்தானாம்

அழுக்குப் போக துடைத்தானாம்

ஆகா தொட்டி, என்றானாம்

இடுப்பில் வைத்துப் பார்த்தானாம்

ஆகா கூடை என்றானாம்

தலையில் கவிழ்த்து நடந்தானாம்

ஆகா தொப்பி என்றானாம்

தொப்பி தொப்பி தொப்பியென்றே

சொல்லிக்கொண்டு நடந்தானாம்

மிடுக்கைக் கூட்டி நடந்தபோது

தடுக்கி கீழே விழுந்தானாம்

தொப்பிப் பானை நொறுங்கிவிட

சோர்வில் துவண்டு நின்றானாம்